توعد مرتضى منصور رئيس مجلس إدارة نادي الزمالك بعض لاعبي الفريق الأول لكرة القدم بالنادي الأبيض بالإفصاح عن تفاصيل عقودهم مع النادي ومعاقبتهم بعد تسريب بعض الأخبار التي وصفها بالكاذبة.

وقال مرتضى منصور في مقطع فيديو نشره على قناته عبر يوتيوب: "أنا بقول لجمهور الزمالك يا تتحملوا السنادي يا إما الزمالك هيتركب 100 سنة قدام، لاعب كان بياخد 750 ألف بياخد في إيده 22 مليون ونصف بيقول مش هنزل التمرين، ولاعب لف كل أندية مصر وباس الايد علشان يرجع ويقول أنا مش هلعب علشان مصاب".

وأضاف: "هتتربوا، الأخبار اللي سربتوها لأصحابكم كلها كذب، وأنا قولت مفيش حد هيلوي دراع مرتضى منصور ولا نادي الزمالك، لازم العدل يرجع تاني، فيريرا مستبعدش حد إنما جاي دلوقتي تقولي الخلفية والضامة، لا ده عند بابا وماما مش عندي، وهكشفكم قدام مصر كلها زي ما كشفت الباقيين".

وأكمل: "نادي الزمالك فيه ملايين دلوقتي وكل لاعبي الفرق الجماعية بياخدوا فلوسهم في وقتها، لكن لاعبي كرة القدم لا، لما أوريكم العقود اللي اللجان عملتها فضيحة، وعاوزين نكسب؟ طب ازاي، لازم كل واحد يرجع لحجمه الطبيعي، جماهير الزمالك واعية ومعندهاش عزيز".